УИХ-ын гишүүн С.Амарсайхан саналаа өглөө

УИХ-ын гишүүн, УИХ дахь МАН-ын бүлгийн дэд дарга, Налайх дүүргийн МАН-ын хорооны дарга С.Амарсайхан  2020 оны аймаг, нийслэл, сум, дүүргийн ИТХ-ын сонгуулийн саналаа Налайх дүүргийн 3 дугаар хорооны байранд  өглөө. Тус хорооны хэсгийн хувьд өдрийн 13 цагийн үед нийт сонгогчдын ирц 28,82 хувьтай байв.

УИХ-ын гишүүн, УИХ дахь МАН-ын бүлгийн дэд дарга, Налайх дүүргийн МАН-ын хорооны дарга С.Амарсайхан энэ үеэр  “Иргэний үүргээ биелүүлж Налайх дүүрэгт ирж саналаа өглөө. Энэ удаагийн орон нутгийн сонгууль их онцлогтой. Сонгуулийн тухай шинэ хуулийн дагуу аймаг, нийслэл, сум, дүүргийн ИТХ-ын төлөөлөгчдийг сонгох сонгууль зэрэг явагдаж байгаа. Иргэдийн хувьд идэвхтэй байна. Иргэдийн төлөөлөгчдийн сонгууль гэдэг бол амьдралд ойр, ахуйн асуудлуудыг шийдэх, айл өрх бүрийн аюулгүй амьдрах орчин нөхцөлийг бүрдүүлдэг нөгөө талаар төр, иргэн хоёрыг холбодог нутгийн захиргааны байгууллагуудын удирдлагуудыг сонгох чухал сонгууль. Улсын их хурлын сонгууль бол бодлогын сонгууль байдаг бол орон нутгийн сонгууль таатай амьдралын төлөө хийж байгаа сонголт байдаг. Хог хаягдлаасаа эхлүүлээд гэрэлтүүлэг, ахуйн орчин, аюулгүй байдал, зам, дэд бүтэц гэх мэт бүхий л асуудлыг шийдэх чухал сонгууль учраас иргэд идэвхтэй оролцож байгаа харагдаж байна” хэмээлээ.  

Санал хураалт оройн 20.00 цаг хүртэл үргэлжилнэ. Санал хураалтын дараа хуульд заасны дагуу бүх хэсгийн хороонд хяналтын тооллогыг саналын хуудасны 50 хүртэлх хувьд явуулах юм.

Хуваалцах